القلم الذهبي - استعطف قلب الشعب المصرى للزجال محمد سرور

اتمسكن كده واتمكن اعمل نفسك كده عيان
استعطف قلب الشعب المصرى انسى انك انسان

انسى انك ظالم وان الشعب فى عهدك مات م الجوع
وانك دمرت شباب وقطعت رقاب ولا صوت مسموع
خليك نايم فى سريرك الغى ضميرك عيش مخدوع
فى حساب فى الدنيا راح هتشوفه وحساب م الديان

ليه تعمل مصر وسيه انت وشله من الحرافيش
ليه دست الشعب المصرى وجاع واتزل عشان العيش
وحكمت الشعب بجمره نار بأدين ظايط وشويش
والشرطه قصاد الثوره ضحت بيك وبقيت عريان

خليت كده مصر بخيرها وخيرات نيلها تصب اليك
وجمعت فى ميت مليار والشعب فى نار ومأمن ليك
واهو جالك يوم دعوه مظلوم ملايين دى بتدعى عليك
يكفيك الاعيبك انت وديبك دا الشعب الكسبان

حركاتك مش هتخيل على شعب سقيته المر سنين
من نفس الكاس راح تشرب انت وننى عنيك الاتنين
فيه حاكم عادل قادر يخسف بيك دا فى غمضه عين
لكن له حكمه تصبح عبره تعيش مذلول وجبان

اتمسكن كده واتمكن اعمل نفسك كده عيان
استعطف قلب الشعب المصرى انسى انك انسان

الزجل
محمد سرور